March (23) bat Manga 2012 hta Wunpang Mungdan Shanglawt Asuya Dap Ba (3) ginra rai nga ai Manmaw - Loi Je lam n'tsa na mare ni rai nga ai Sinlum Pangmu mayan de KIA Dap Dung (21) na Myu Tsaw Share Shagan ni hte myen hpyen asuya a tat-ma (88) na hpyen hpung ni gap gasat lai wa ai lam shiga na chye lu ai.

March (13) ya shani hta mung, Jinghpaw Wunpawng Hkalup Hpung (KBC) a labau shang masat Manmaw Ginwang Sinlum, Pangmu mare na Nawku Jawng kaba (Dr. Ola Hanson Masat Nawku Htingnu) gata na arung arai ni hpe mung wan-nat jahten shaza ya lai wa sai lam shiga na chye lu ai. Nawku Jawng na Hpung Masha jahpan laika buk ni yawng hte dung lahkum ni mung wannat kau ya lai wa ai lam, na chye lu ga ai. Sinlum Pangmu Duwa Rev. Lahpai Zau Tu a aru arat ni a Lahpai Du Nta kata Dawdap kaw mung la hpa n'nga mat hkra Myen Hpyenla ni ayai aya hpya kau nna arung arai ni hpe mung shaw la kau ya mat wa  sai lam shiga na chye lu ai.

2012 ning March (20) ya shani hkying (3:30)pm aten kawn hkying (5:00)pm aten laman, KIA Masat (5) Dap Ba ginra, Wa Baw Bum kaw nna Ban Dawng maga lai sa wa ai, Myen Hpyen Dap, Hk.L.Y Masat (40, 383) na pawng hpawm hpyen hpung ni hte KIA Masat (5) Dap Ba na hpyen hpung ni Ban Dawng lawu Edin mare ( Nam San Hka kau) kaw gasat poi byin ai lam chye lu ai.

Gasat poi byin ai shara hta lahkawng maga de na si, hkala hkrum ai lam hpe atsawm n chye lu ai.

2012 ning March (19) ya shani hkying (10:10)am aten kawn shana maga hkying (6:00)pm aten laman, Myitkyina-Manmaw lam makau Npawn mare hte Gang Dau Yang lapran na Slg. Lajawn Ngan Seng (Wun Ji) a Rubber sun kawng kaw shara la nga ai KIA Masat (255) Dap Nawng, Dap Dung na hpyen hpung ni hpe Myen Hpyen Dap, Hk.L.Y Masat (260), Hk.M.Y Masat (390) na hpyen n-gun (250) daram hte laja lana htim gasat, Myen Hpyen Dap ni hku nna Gung nsa bawm (Chemical Bawm) gap ai majaw, KIA maga de na hpyen hpung ni baw sin, madawn nna nsa sa yak ai zawn re lam byin ai hpe chye lu ai.

Hkying hkum (8) daram na ai gasat poi hta KIA maga de na marai (3) hkala hkrum ai rai nna, Myen Hpyen Dap maga de na marai (30) daram hkala ai lam chye lu ai.

Myen Hpyen Asuya gaw ya na zawn KIA hpyen hpung ni nga ai shara hpe hpyen n-gun laknak kaba hte laja lana gasat nga ai majaw, Gang Dau Yang, Npawn, Nrawng Sam hte Ja Hta mare hkan na Mung mare masha ni yawng hpyen majan hkrit nna hprawng koi yen hkawm mat nga ai, Mung mare masha ni a du sat yam nga hte dum nta ni hpe Myen Hpyen Dap ni kam ai hku gap sat sha, jahten sharun nga ai hta n-ga, yi sun hkanau, Rubber sun ni hpe sharaw wan nat jahten nga ai lam hpe mung matut na chye lu ai.

2012 ning March (17) ya shani hkying (9:00)am aten kawn hkying (9:45)am aten laman, KIA Masat (5) Dap Ba ginra, Ting Lung kaw du nga ai Myen Hpyen Dap, Hk.M.Y Masat (388) na hpyen hpung ni hte KIA Masat (5) Dap Ba na hpyen hpung ni gasat poi byin ai lam chye lu ai.

Gasat poi byin ai hta Myen Hpyen Dap, maga de na marai (4) si ai rai nna, marai (6) hkala ai lam chye lu ai.

Ya ten, Myen Hpyen Dap, Ts.K.Hk Masat (21), Ts.K.Hk Masat (3) na pawng hpawm hpyen hpung ni, Daw Hpum Yang hte Ja Ing Yang grup yin de htu, du shang nga ai lam hpe mung, matut na chye lu ai.

2012 ning March (17) ya shana hkying (8:15)pm aten kawn hkying (10:30)pm aten laman, KIA Masat (2) Dap Ba ginra, Pang Hkawn Yang mare lawu kaw du nga ai Myen Hpyen Dap, (M.P.Hk, Y.M.Hk) na pawng hpawm hpyen hpung ni KIA Masat (5) Dap Dung ni a ginra de htu lung wa ai majaw Pang Hkawn Yang hte Sisat grup yin kaw gasat poi byin ai lam chye lu ai.

Gasat poi byin ai shara hta lahkawng maga de na si, hkala hkrum ai lam atsawm n chye lu ai.

2012 ning March (16) ya shani hkying (9:20)am aten kawn hkying (9:45)am aten laman, Hk.M.Y Masat (389,390), Hk.L.Y Masat (260) Dap na n-gun (200) daram, Gang Dau Yang Gaw Sharawt Rung, maga kaw du nga ai rai nna, KIA Masat (255) Dap Nawng Dap Dung na hpyen hpung ni hte gasat poi byin ai lam chye lu ai. Gasat poi byin ai shara hta lahkawng maga de na si, hkala hkrum ai lam atsawm n chye lu ai.

Ya ten, KIA Masat (5) Dap Ba ginra, Gang Dau Yang maga, myen hpyen n-gun (500) daram du nga ai rai nhtawm, hpyen n-gun htu kahtap nga dingyang re lam hpe mung chye lu ai.